എഴുത്ത്

വാക്കുകളവിടെ തടഞ്ഞു വെച്ചിരിക്കയാണ്
ബുദ്ധിയിൽ പാടയിറങ്ങിയ പോലെ
ആശയങ്ങൾ വറ്റിത്തുടങ്ങിയിരിക്കുന്നു.
നാളെ മുതൽ ധ്യാനിച്ചുതുടങ്ങണം.
കുളക്കരയും പൊന്മയും സന്ധ്യകളും
ചേർത്ത് ഓരോനിമിഷവും ധ്യാനപൂതമാക്കണം.
ധ്യാനത്തിൽ കാക്കകരയുന്ന ശബ്ദം കുപ്പിയിലാക്കി
രാവിലെ മുറ്റത്തേയ്ക്ക് ഒഴിക്കണം.
മുറ്റമടിക്കുന്ന ശബ്ദം കൊണ്ട് തലങ്ങും വിലങ്ങും വരകളുണ്ടാക്കണം.
വരകളിൽ കാക്കക്കാലുകൊണ്ട് കോപ്പിയെഴുതണം.
കയ്യിൻറെ വെള്ളയിൽ കിട്ടിയ അടി പിഴിഞ്ഞ്
നോവെഴുതണം