ചൂട്ടുപോൽ കെട്ടുപോകും

റോട്ടിന്നോരത്തു ചെന്നിട്ടനവധിധൃതിയായോടിടുന്നോരെ നോക്കി-

പ്പൊട്ടിപ്പൊട്ടിച്ചിരിക്കാനടിമുടിയുറയുന്നുണ്ടു ജീവൻ്റെ തള്ളൽ 

കഷ്ടം നൃത്തം തിമർക്കുന്നിലകളെയലയും കാറ്റിനേ പുഞ്ചിരിക്കാൻ

മൊട്ടിന്നുള്ളീന്നിറങ്ങും സുമതതിയെയിവർ കാണ്മതില്ലെന്നു തോന്നും

ഓരോരോ വേവലാതിപ്പടലകൾ വെറുതേയേറ്റിവെയ്ക്കും തലയ്ക്കാ-

യോരാതോരോന്നു ചെയ്തിട്ടവയുടെ കനവും നാളുതോറും കനക്കും 

ചോരും കാലത്തിലൊട്ടും കരുതലുമിയലാതങ്ങുമിങ്ങും തുലയ്ക്കും 

തീരും പോകേണ്ടദൂരം കഴിവതിനിടയിൽ ചൂട്ടുപോൽ കെട്ടു പോകും