തുമ്പപ്പൂ

തുമ്പപ്പൂവ്വേ തുമ്പപ്പൂവ്വേ 

ഓണം വന്നു മടങ്ങീലോ 

എന്നിട്ടും നീയ്യെന്താണിങ്ങിനെ?

ആരേക്കാണാൻ നിൽക്കുന്നൂ?

വിനയാന്വിത നീ കാണുന്നുണ്ടാം 

ഓണത്തപ്പൻ തിരുവരവ്. 

ചതിയും കള്ളവുമറിയാതുള്ളൊരു 

ചെടി നീ അറിയുന്നുണ്ടാകാം. 

സ്വർണ്ണത്തേരിലെഴുന്നൊള്ളീടും 

മാവേലിപ്പൊൻ തംബ്രാനെ.

കഥയിൽ കേട്ടിട്ടറിയാമെന്നു 

നിനയ്ക്കുന്നോരീമനുജന്മാർ. 

സത്യം! സത്യം! ഞാനറിയുന്നേ- 

യില്ലാ നമ്മുടെ തംബ്രാനെ.

നിന്നുടെയരികത്തെത്തീടുമ്പോൾ 

താഴെയിറങ്ങീടും നേരം 

ഓണക്കോടികളില്ലാതെങ്ങിനെ 

വരവേറ്റീടും തംബ്രാനെ 

കറികൾ നാലും വെയ്ക്കാതെങ്ങിനെ 

വരവേറ്റീടും തംബ്രാനെ 

തുമ്പേ തംബ്രാൻ വന്നുകഴിഞ്ഞാ- 

ലെന്നോടും നീ ചൊല്ലേണം 

അല്ലെങ്കിൽ നീ ചൊല്ലിത്തരണം 

ബലിയെക്കാണാനുള്ള വഴി